Blog Archives

20/10/2016

Bókaframløga - Nólsoyar Páll

– siglingarmaður og skald

Fríggjadagin 21. oktober kl. 17.00 verður bókin ”Nólsoyar Páll – siglingarmaður og skald,” sum Óli Olsen hevur skrivað, løgd fram í Gamla Seglhúsinum í Klaksvík.

Hanus G. Johansen leggur fyri við tónleiki, síðan bjóðar rithøvundurin vælkomin og sigur nøkur orð. Eftir hetta verður høvi at ogna sær bókina signeraða og annars njóta lættari ábit og okkurt leskandi.

Øll eru væl komin til bókarframløguna í Gamla Seghúsinum í Klaksvík.

Um bókina:
Nú 250 ár eru liðin, síðan Nólsoyar Páll var borin í heim, verður roynt at lýsa fjøltáttaða persónin so heilskapaðan, sum til ber.

Barna- og ungdómsárini verða umrødd í stuttum, sagt verður frá, tá ið Páll fer at sigla, tekur stýrimansprógv og fer í langfarasigling.

Sagt verður frá Royndini fríðu, sum Páll smíðar saman við øðrum monnum, og nomið verður við stríð hansara móti donskum embætismannavaldi í Føroyum.

Árni Dahl hevur skrivað part um skaldið Nólsoyar Páll.

12/10/2016

LISTAFRAMSÝNING - LUDVÍK Á BREKKU

Sunnudagin 16. oktober klokkan 15, letur Ludvík á Brekku upp listaframsýning í Gamla Seglhúsinum.

Ludvík á Brekku (føddur Breckmann í 1985) er ein føroyskur listamaður, rithøvundur og tónleikari. Hann hevur útgivið tvey yrkingasøvn og hevur myndprýtt fleiri bøkur. Hann var formaður í Rithøvundafelag Føroya eitt stutt skifti í 2015. Hann hevur lisið til lærara í Havn og tók farloyvi eitt ár, fyri at taka listarliga útbúgving á listaháskúla í Danmark, har hann var liðugur í 2014. Hann hevur seinni gingið á Listaháskóla Islands frá 2015. Í 2014 hevði hann listaframsýning í Smiðjuni í Lítluvík. Hann er bróðir yrkjaran Sissal Kampmann, og hevur hann myndprýtt yrkingasøvn hennara.