Leygardagin 20. august verður listaframsýning við Eyðun av Reyni opin, Waagbilar sýna fram bilar uttanfyri Gamla Seglhúsið og bjóðar til hummarasuppu við navnframa kokkinum Gutta Winther. Um kvøldið verður serligt fiskaborðhald, har møguligt er at melda seg til

Skrá fyri Gamla Seglhúsið á Sjómannadegnum:

Leygardagin 20. august
Kl. 14:00 - 18:00: Listaframsýningin við Eyðun av Reyni er opin
Kl. 14:00 - 18:00: Waagbilar sýnir fram bilar uttanfyri Gamla Seglhúsið og bjóðar hummarasuppu, ið navnframi kokkurin Gutti Winther borðreiðir
Kl. 20:00: Serligt fiskaborðhald við Gutta Winther, har borðreitt verður við laksi frá Hiddenfjord, Jomfrúhummara og øðrum spennandi úr sjónum. - Plássið er avmarkað til 32 fólk og áhugaði kunnu boða frá á tel. 217055.
 
Sunnudagin 21. august 2016
Kl. 14:00 - 18:00: Listaframsýningin við Eyðun av Reyni er opin
Kl. 14:00 - 18:00: Waagbilar sýnir fram bilar uttanfyri Gamla Seglhúsið

Hjartaliga vælkomin!

Grannakaffi á Gamla Seglhúsinum í Klaksvík leygardagin 5. mars - frá kl. 13:00 til 16:00.

Klaksvíkar Rotary Klubbi og Klaksvíkvar Innerwheel Klubbi bjóða kaffi og okkurt gott afturvið. Møguleiki er at síggja listaframsýningina hjá Martin Joensen.

Kl. 15:00 kemur listamaðurin, sum eisini er sera dugnaligur tónasmiðjur, at undirhalda við tónleiki og annars siga frá um sínar upplivingar. Øll eru hjartaliga vælkomin at stuðla tiltakinum!

Innkomin peningur fer óskerdur til Krabbameinsfelagið

Vit á Gamla Seglhúsinum ynskja at takka fyri góðu undirtøkuna til tiltøkini í Gamla Seglhúsinum leygardagin á Torradøgunum og gjørdu okkum dagin minniríkan. Listaframsýningin við Martin Joensen fekk eina serstaka góða byrjan og hummarasølan uttanfyri bleiv dúligani vitjað. Ein serstøk tøkk til kokkin, Kristian í Vági, fyri sera vælsmakkandi hummarasúpan. -  Her eru nakrar løtumyndir frá degnum.

Í Gamla Seglhúsi er listaframsýning við Bárði Jákupssyni um dagarnar. Í dag var fernisering, har Jógvan Skorheim, borgarstjóri helt røðu. Bárður Jákupsson er ein av Føroya fremstu listafólkum, og um dagarnar hanga 25 málningar hjá honum til søluframsýning í Gamla Seglhúsi. Framsýningin er uttan heiti, og allir málningarnir eru oljumálningar.

Í dag var fernisering, har Jógvan Skorheim, borgarstjóri helt røðu. Bárður Jákupsson var eisini sjálvur til ferniseringina og fleiri vitjandi nýttu høvið at heilsa uppá listamannin, sum sjálvur sigur, at málningarnir í framsýningini kunnu býtast í tríggjar ymiskar bólkar eftir stíli.


Niðanfyri er røðan hjá Jógvan Skorheim, borgarstjóra endurgivin:

"Góðan dag øll somul
og takk fyri, at eg varð boðin at halda røðu til hesa ferniseringina.

Eg trúgvi, at í einum samfelag sum tí føroyska er tað altavgerandi, at vit hava borgarar, sum eru aktivir á fleiri ymsum økjum. Fólk, sum hava nógvar gávur og brúka tær væl.

Bárður Jákupsson er eitt av hesum fólkum, sum eg hugsi um. Tí umframt at vera listamaður, hevur Bárður eisini aðrar dygdir, sum koma samfelagnum til góðar.

Eg havi lisið eitt sindur uppá, og eg kann fortelja, at:

Hann er føddur á Tollaksmessu í 1943 og er sostatt 71 ára gamal.
Hann er giftur Hervør Lützen og tey eiga tríggjar synir.
Hann er sjálvur sonur ein av okkara fremstu rithøvundum.
Nemliga Hans Jacob Jacobsen, sum vit kenna betri sum Heðin Brú.

Bárður hevur sanniliga lyft arvin eftir pápa sín, sum ein av føroya fremstu mentanarberarum.

Eftir lokna læraraútbúgving tók hann tvey ár á listaháskúlanum í Keypmannahavn, áðrenn hann kom aftur til Føroya í 1972. Tá tók hann við sum lærari á Fólkaháskúlanum. Her var hann lærari í seks ár – til 1978, tá hann gjørdist leiðari á Listaskálanum. 11 ár seinni fór hann í starv sum stjóri í Listasavn Føroya. Hetta var í 1989, og her var hann stjóri fram til 2003.

Vit kenna eisini Bárð í fleiri øðrum leiklutum. Vit kenna hann fyri tey mongu frímerkini, hann hevur myndprýtt fyri Postverkið. Vit kenna hann sum ritstjóra á tíðarritinum Mondul. Og vit kenna fleiri góðar bøkur um list og listafólk, sum Bárður hevur skrivað.

Eg skal ikki gera meg alt ov klókan uppá list. Men sum gemenur, áhugaður áskoðari dugi eg at síggja hugflogið og fjølbroytni í málningunum hjá Bárði. Framsýningin her rúmar trimum ymsum stílum, og tað avspeglar hvussu fjølbroyttur Bárður er í sini list. Líkasum hann eisini er tað í sínum virki.

Litspælið í málningunum er ikki at taka feil av, og teir kunnu tulkast ymsar vegir, alt eftir eygunum, sum síggja. Tað ber eisini til at standa longri við sama málning. Tá koma nýggjar myndir í myndini til sjóndar.
Bergtakandi teknikkur. Og sum sagt: eg eri ongin listaserfrøðingur, men míni eygu síggja, at:

Bárður Jákupsson er listafólk av Guds náði
Hann er royndur savnsleiðari
Hann er kendur frímerkjaprýðari
Hann er væl lisin rithøvundur

Og eg kundi hildið áfram við núverandi og fyrrverandi titlum. Tí eg havi verri enn so verið inni á øllum, sum Bárður hevur fingist við. Niðurstøðan er greið: Bárður Jákupsson er eitt multitalent.

Ein meining við list er at vekja tankar. Eitt dugnaligt listafólk megnar at fáa áskoðaran at reflektera. Tað kann sjálvandi bæði vera inneftir, úteftir, uppeftir og niðureftir. Avmarkingar taka seg ikki væl út í list. Og tá ið vit tosa um listina í hesi framsýning, so liggur tað eisini nærri at hugsa um møguleikar heldur enn avmarkingar.


Við málningunum hjá Bárði skapast ein nýggjur heimur. Ein heimur, sum ikki var til, áðrenn listamaðurin tók pensil í hond. Ein heimur, sum stendur opin fyri tulking og úrtøku. Ein heimur, har vit áskoðarar kunnu sveima frítt. Og tað fara vit jú at kunna í nakrar vikur, ímeðan málningarnir hjá Bárði prýða veggirnar her í Gamla Seglhúsi.

At enda vil eg takka Bárði fyri at koma til Klaksvíkar við hesum 25 verkunum.

Og eg vil takka tykkum í Gamla Seglhúsi fyri at skipa fyri. Takk fyri tykkara megnar arbeiði, sum blesur lív í mentanarlívið í Klaksvík."

Grein frá nordlysid.fo 
Skrivað hevur Oliver Joensen

Tað segði Torbjørn Olsen, listamaður, tá vit hittu hann við ferniseringina í Gamla Seglhúsi í Víkunum ídag.

Tað eru tey bæði, Jastrid og Símun Gullaksen, ið reka Gamla Seglhúsið og sum hava haft og fáa listafólk til regluligar framsýningar á Gamla Seglhusinum.

Saman við Torbirni, var eisini bróðurin Marius Olsen við í Klaksvík ídag, hóast hesin seinni ikki hevði framsýning her hesaferð.

Teir báðir eiga nógva familju her. Torbjørn segði mær, at teir vóru ikki nógv her sum smádreingir. Ein orsøk hevur helst verið, at Mikkjal Olsen, pápi Kristian Fríðrik Olsen, var tann seinasti av eldra ættarliðnum, ið flutti av Húsum, har brøðurnir eru ættaðir, og tí stóðu húsini tóm stóran part av okkara dreingjatíð og tí var ikki so nógv hjá okkum at koma til Húsar til tá.

Men seinni keypti pápi Húsuni á Húsum fyri eina krónu frá restini av familjuni, og vit beiggjarnir hjálptu so honum at seta tey í stand. Eg minnist at eg og Olivur við Neyst brúktu tey nógv eitt skiftið. Vit eiga framvegis húsini og tey eru í góðum standi. Vit eiga eisini  eitt systkinabarn, sum pápi okkara nevndi fyri lítlasystir, tað er Marita Matras, kona Thorleif Matras í Klaksvík, so her eiga vit nógva familju.

---

Sum sagt, so var Torbjørn sera ovfarin av søluni. Tað mundi ikki ganga meira enn góður hálvur tími frá tí at ferniseringin hevði verið og til stóri parturin av málningunum vóru seldir. Torbjørn hevði 17 málninga á framsýningini og um trýtíðina vóru einans fýra smáir eftir, ið ikki vóru seldir.